Илија Димовски од ВМРО-ДПМНЕ, денеска ја обвини Владата дека се однесувала незаинтересирано по серијата пожари кои настанаа низ територијата на цела Македонија, и рече дека пратениците од ВМРО-ДПМНЕ и Коалицијата „За подобра Македонија“ ќе достават информација до Собранието со барање за итна седница поврзана со состојбата со пожарите.
– Очигледно е дека нема никаква активност, дека има целосна незаинтересираност, пасивност и слаба рекција од страна на државните органи посебно од Владата. Има неодговорно и неспособно однесување. Имаат донесено некакви заклучоци но нема никаква реализација на заклучоците и нема присуство на терен. Нема чувство спрема потребите на граѓаните и барањата на граѓаните, обвини Димовски.
Според него посебен и исклучително значаен како пример е пожарот во село Требовље во Поречието кој што според информации на ВМРО-ДПМНЕ, две недели откако се појавил пожарот, немало никаква реакција од страна на државата. Значи две недели некој свесно го оставил тој пожар да гори без да превземе никакви активности.
– Имаме некаква одредена информација која што ја разгледувала Владата на Република Македонија и не знаеме дали е за смеење или е за плачење. Во информацијата кажуваат дека во некои пожари интервенирал еден пожарникар, на друг пожар интервенирале три пожарникари, на трет пожар се активирале двајца пожарникари значи никаква реална активност која што требало да биде превземена. Очигледна спротивност на тоа што граѓаните беа навикнати до пред една година кога во вакви ситуации имаше брза активност и имаше целосно присуство на терен на институции и владини, рече Димовски.
Димовски исто така ја обвини Владата предводена од СДСМ дека не била заинтересирана ниту за земјотресите во Охридскиот регион, односно дека властите биле пасивни.