За време на преговорите на работните групи задолжени за Договорот од Пржино, а кои се однесуваат на Државната изборна комисија, се пробувале разни методологии според кои било дојдено до потесен круг на кандидати-експерти, но СДСМ одбивал во последен момент, рече денеска на брифинг со новинарите, Илија Димовски од ВМРО-ДПМНЕ.
Сепак, според неговите зборови, најверојатно процесот на избор на експерти во ДИК е при крај бидејќи останал спорен само уште еден експерт, кој треба да биде предложен од албанските партии ДУИ и ДПА.
– Издвоивме шест кандидати за двете места кои треба да бидат прифатливи за СДСМ и ВМРО-ДПМНЕ. По долга анализа и расправа СДСМ предложи две имиња и ние веднаш ги прифативме, истакна Димовски, образложувајќи дека со тоа ги изненадиле СДСМ.
Потоа останало прашањето за кандидатот предложен од ДУИ и ДПА, а без никаква најава, потенцираше Димовски, СДСМ го отфрлил предлогот со образложение дека Албанецот-експерт бил “вмровец“.
– Тоа е очигледно намера на СДСМ да не се постигне договор за ДИК, тврди тој.
Пред новинарите тој рече дека на тоа реагирале двете албански партии кои предложиле потоа нов кандидат кој СДСМ повторно го одбил.
Димовски тврди дека СДСМ побарале огласот за последниот кандидат од експертите, предложен од ДУИ и ДПА да биде обновен по што следела реакција од работните групи на ДУИ и ДПА дека тоа е еден вид “сегрегација“.
– Ние принципиелно стоиме на тоа дека доколку албанските партии се согласат во нивниот избор и го поддржат и двете партии, ние ќе стоиме зад изборот, рече Илија Димовски од ВМРО-ДПМНЕ.
Тој нагласи дека сепак доколку поради пробиените рокови, странските медијатори одлучат да настапат со нивни избор, ВМРО-ДПМНЕ тоа нема да го прифати.
– Ние сме благодарни на помошта од европските посредници но не е прифатливо Собранието со суверено право да се раководи по диктат, ја отфрли оваа можност Димовски.
Партиите за време на преговорите при изборот на кандидатите, користеле разни методологии, меѓу кои “негативна селекција“, односно оние кои дефинитивно нема да ја добијат поддршката и на “позитивна селекција“, односно оние кои би влегле во потесен круг.
За среќа, како што вели тој, варирале разни имиња и предлозите не се поклопувале.
Од друга страна, СДСМ на брифингот кој претходеше на оној на Илија Димовски, рекоа дека процесот на избор на експерти е закочен бидејќи ВМРО-ДПМНЕ барале избор кој не бил по европски стандарди и критериуми.
Според потпретседателот на СДСМ, Дамјан Манчевски, се карикира целиот договор и тотално се партизира експертската група, со наметнувањето од ВМРО – ДПМНЕ, за избор на членови во ДИК како експерт да се предлага некој кој всушност бил набљудувач во избирачки одбор.
Според договорот, тројцата членови на експертската група е пропишано да се изберат со консезус, но со ваквото минирање на процесот на одлучување, вели Манчевски, СДСМ го става под прашање целиот процес на избори во ДИК, и со тоа се проблематизираат и самите избори на 24 април следната година.