Министерството за надворешни работи на Русија го повика вториот човек во американската амбасада во Москва Ентони Годфри и му врачи протесна нота поради намерата на американските власти да извршат претрес Трговската мисија на Русија во Вашингтон.
“Ние го повикавме советникот-амбасадор на американската амбасада во Москва Ентони Годфри. Му предадовме протесно писмо во врска со волјата на американските власти да вршат претрес во трговската мисија на Москва во Вашингтон”, стои во соопштението на руското министерство.
Во писмото се вели дека “планираниот нелегитимен претрес на дипломатските простории на Русија без присуство на руските власти ја сметаме за агресивна акција која американските разузнавачки агенции би можеле да ја искористат за организирање на антируски провокации со помош на подметнати компромитирани предмети”, додава соопштението. И се додава дека Москва го задржува правото на возвратни мерки на основа на реципроцитет.
Претходно Москва соопшти дека специјалните служби на САД имаат намера на 2 септември да извршат претрес во рускиот конзулат во Сан Франциско, а американскиот Стејт департмент одби да ја коментира оваа информација.
Во четврокот Вашингтон нареди затворање на рускиот конзулат во Сан Франциско и на руските трговски мисии во Њујорк и Вашингон. На крајот на јули Владимир Путин побара од 755 американски дипломати да ја напуштат Русија како руски одговор на американските санкции против Москва.
Денес Кремљ соопшти дека рускиот претседател Владимир Путин нема да присуствува на Генералното собрание на Обединетите нации (ОН) што ќе се одржи подоцна месецов.
Генералната дебата на собранието на ОН е закажана за 19 септември кога се очекува првото обраќање на американскиот претседател Доналд Трамп.