Владимир Путин вечерва најави дека 755 американски дипломати ќе треба да ја напуштат Русија како руски одговор на американските санкции против Москва. Путин не се надева на скорешно подобрување на односите помеѓу двете светски сили.
“Долго чекавме надевајќи се дека ситуацијата ќе тргне кон подобро. Но се чини дека тоа нема да се случи наскоро дури и ако ситуацијата се подобри”, изјави рускиот претседател на руската државна телевизија Русија 24.
Американскиот Конгрес усвои неодамна нови санкции против Русија поради руското мешање во американските претседателски избори.
“Мислев дека треба и ние да покажеме дека нема да ги оставиме работите без реакција по таа американска одлука донесена без никаква основа”, подвлече Путин.
Според него 755 американски дипломати ќе мораат да ја напуштат Русија по одлуката на руското министерство за надворешни работи да го редуцира американското дипломатско присуство. Од 1 септември во амбасадата на САД во Москва и во козулатите во Русија ќе останат 455 дипломати.
Над илјада американски дипломати работат во Русија и, според Путин “755 ќе мораат да ги прекинат нивните активности во Русија”. Со оваа одлука бројот на американските дипломати во Русија ќе се изедначи со бројот на руските дипломати во САД.
Агенцијата АФП побарала реакција од Белата куќа но оттаму одбиле да ја коментираат руската одлука за бројот на службеници кои работат во странски мисии.
Според Путин, Русија “има уште што да каже и може уште повеќе да ги редуцира областите на заеднички активности кои би биле чувствителни за американската страна”. Ако притисокот врз Русија продолжи, вели Путин, Русија “може да разгледа и други акции но се надевам дека тоа нема да се случи”, изјави Путин.