Гинеколозите не се виновни во случајот со родилката и нејзиното бебе кои починаа во гевгелиската болница. Грешката е направена од страна на анестезиолозите, неофицијално дознава НОВА, од истрагата и вештачењето. На Институтот за судска медицина велат дека целото внимание е насочено на овој случај и дека од неделата изутрина, вработените не се излезени од лабораторија, работат под полна пареа се додека не ги завршат анализите за случајот. Не сакаа да прецизираат кога ќе биде затворен случајот од нивна страна.
Од друга страна директорот на гевгелиската болница Сретко Јованов вели дека нема да им даде отказ на анестезиолозите, за кои обвинителството потврди дека биле пијани за време на операцијата. Јованов за НОВА изјави дека нема да им биде прекинат работниот однос додека не биде завршена правната процедура. Тој се уште тврди дека не забележал дека анестезиолозите биле под дејство на алкохол додека траела операцијата.
„ Од 22 часот па се до 23 и 30, јас не забележав такво нешто. Заедно со едниот анестезиолог ја интубиравме родилката“ вели директорот Јованов.
На прашање на НОВА дали досега забележал дека овие двајца лекари доаѓаат под дејство на алкохол на работа, тој одговори дека ниту забележал, ниту има поплаки од пациенти и вработени за такво нешто.
„Не, на работа не сум го видел да доаѓа пијан ниту едниот, ниту другиот анестезиолог кај кого исто така е пронајден алкохол во крвта“, рече Јованов за НОВА.
Според обвинителството кај лекарите е утврдено присуство на алкохол во крвта и тоа во големи количини. Анализата на примероците на крв извршена од страна на Министерството за внатрешни работи покажала 1,23 промили кај едниот и 1,75 промили алкохол кај другиот анестезиолог.
За разлика од директорот , сопругот на почината родилка Мите Кадиев, обвини дека анестезиологот на операција дошол пијан.
„Слушнав дека гинекологот зборува на телефон со директорот на болницата и му рече „Дојдете да видите во каква состојба ви е персоналот“. Пред да се јави ми кажа дека не може да ја направи операцијата додека анестезиологот е во таква состојба. Два пати пробувал да и стави тубус и не можел да го стави. Општо е познато, а и полицајците кажаа дека тој анестезиолог, а и другиот, кој не знам дали беше таму, постојано се пијани. Затоа и доцнеше операцијата еден час, рече Кадиев.
Вработени во болницата, но и граѓани на Гевгелија, Дојран, Богданци и околните села кои се лекуваат во гевгелиската болница, за НОВА тврдат дека двајца анестезиолози кои го опслужуваат целиот овој регион, често се во алкохолизирана состојба.
На прашањето дали чувствува одговорност и дали ќе си даде отказ од функцијата, Јованов одговори дека ова е поединечен случај кој ќе биде санкциониран. Но, подоцна сепак, додаде дека не ја исклучува можноста да си замине поради морална одговорност.
„Ова е поединечна грешка и ќе бидат превземени сите мерки виновниците да бидат казнети. Јас лично чувствувам морална одговорност и не е исклучена можноста да си поднесам оставка од функцијата директор на болницата“изјави за НОВА Јованов.
.jpg)
Тоа што во болницата нема гинеколози, односно се ангажираат хонорарно од Струмица, нема педијатри, нема медицинска сестра на детското одделение, како и друг кадар, Јованов го објаснува со решението на Министерството за здравство за хонорарно ангажирање на лекари.
„Па еве, позајмуваме доктори од другите болници или тие што работат приватно. Тие си имаат распоред и доаѓаат на повик. Никогаш не сме чекале повеќе од 10 минути да дојде лекар. Тоа е решение на Министерството за здравство“, изјави директорот на гевгелиската болница.
Од Министерството за здравство каде што официјално испративме прашања, се уште не се изјасниле за случајот кој ја потресе македонската јавност. Сопругот на починатата родилка Мите Кадиев најави дека правдата ќе ја бара до крај и дека мора да одговараат сите оние кои носат одговорност за смртта на неговата сопруга и неродената ќерка.