Девојчето од Миравци кое вчера почина во гевгелиската болница по испиени таблети западнала во тешка состојба по што реанимацијата на лекарите била неуспешна, вели за НОВА директорот на гевгелиската болницата Сретко Јованов.
-Девојчето во 2 часот е донесено во гевгелиската болница. Претходно, откако ги испила таблетите, во обид за самоубиство, била однесена во болницата Валандово каде и плакнет желудникот. На пат кон Гевгелија западнала во тешка состојба, реанимацијата на лекарите била неуспешна и во 04 часот изутрината починала. Најодговорно тврдам дека е направено се што треба, а здравствената состојба не дозволувала да биде транспортирана на Клиниката за токсикологија во Скопје“, изјави директорот Сретко Јованов за НОВА.
Тој ги демантира изјавите на семејството дека се чекало да дојде возило, бидејќи како што тврди возилата им се во дворот. Не појасни дали имало и дежурен шофер или бил на повик.
Според семејството, девојчето починало поради неажурност на персоналот во гевгелиската болница бидејќи откако виделе дека состојбата е критична веднаш не ја испратиле за Скопје.
Сега телото на девојчето е на обдукција во Скопје, а причините за смртта дополнително ќе се утврдуваат.
Ова е втор смртен случај во гевгелиската болница, откако викендов во болницата починаа родилка и нејзиното бебе.