Во Општина Вевчани до 17 часот на гласање излегле вкупно 83,3 отсто од граѓаните со право на глас.
Според претседателот на Општинската изборна комисија во Вевчани Ивица Костојчиноски, изборниот процес во општината од почетокот кога се отворени гласачките места во 07 часот досега тече без проблеми.
Во Вевчани право на глас имаат вкупно 2.055 граѓани кои избираат помеѓу тројца кандидати за градоначалник и три советнички листи за идниот состав на Локалната самоуправа.
Според последните информации од општинските изборни комисии, на локалните избори до 17 часот во Охрид излегле 64,62 отсто од граѓаните со право на глас, додека во општина Дебрца тој процент изнесува 65,8 проценти.
На територијата на општина Охрид изборите се спроведуваат на 73 избирачки места, со 50.686 граѓани со право на глас, додека во општина Дебрца 4.656 граѓани гласаат на гласачки места.
За функцијата градоначалник охриѓани ќе избираат меѓу пет кандидати и 13 предложени листи за советници, додека граѓаните на општина Дебрца ќе избираат градоначалник од четворица кандидати, а ќе гласаат и за една од трите листи за членови на идниот општински совет.
Во општина Могила на 23 избирачки места до 13 часот гласале 2.038 граѓани или 37,23 отсто од вкупното гласачко тело кое според Единствениот избирачки список има 5.476 гласачи.
Жителите на Могила имаат можност да изберат еден од 5-те кандидати за градоначалник и исто толку листи за членови на општинскиот Совет.
Од ОИК Новаци соопштуваат дека до 13 часот на подрачјето на таа општина гласале 46,9 отсто од вкупниот број избирачи. На 23 избирачки места се избира од четири кандидати за градоначалник и исто толку листи со кандидати за членови на Советот на општина Новаци.
Досега и во двете општини не се регистрирани проблеми на гласачките места.
Повеќе од 60 отсто од граѓаните со право на глас излегле денеска на гласањето во општината Кичево, и тоа до 15 часот. Од 48.000 гласачи евидентирани на единствениот избирачки список, досега гласале околу 30.000 граѓани, што не е забележано од постоењето на плурална Македонија.
Рекорд е постигнат во поранешните општини Осломеј и Зајас. Таму до 14 часот излегле над 9.000 гласачи. Повеќето граѓани што гласале специјално допатувале од странство за да го остварат своето избирачко право.
Во општините Дебар и Центар Жупа, изборниот ден минува без никакви проблеми. Во општина Дебар до 17 часот на гласање излегле 7.736 лица со право на глас или 45,6 отсто од вкупно запишаните 16.948 граѓани.