Исплатата на додатокот на пензија кој националните уметници го примаат од државата доцни со месеци.
Како што дознава НОВА, уметниците кои сразмерно своите успеси и национални награди примаат додаток, од месец април до јуни немаат добиено ниту денар.
Задоцнување од два до три месеца се случувало и минатата година.
Во разговорите на НОВА некои од уметниците револтирани од таквиот однос на власта велат, доцнењето им пречи бидејќи „се работи за пари со кои купуваат лекови неопходни за живот“.
Многумина од нив, сепак се благодарни што парите ги добиваат кога-тогаш.
Од Министерството за култура ги потврдија таквите информации, но велат дека имаат технички проблеми.
„Точно е дека тој додаток на пензиите е нередовен. Се работи за технички проблеми, односно се работи на усогласување на додатоците на пензиите со највисоката пензија“, потврди портпаролката на Министерството за култура, Анета Јовановска.
Договорот за исплата на средства како додаток за услугите на националните уметници кон Македонија, беше склучен на 11 јануари 2012 година.
Во друштвото на педесетината уметници, кои го добиваат овој додаток од државата, неодамна се најде и Есма Реџепова.