Македонските власти јавно го објавија договорот со Субрата Рој склучен на 15 години, период во кој неговата компанијата треба да плаќа 121 000 евра годишно. Договорот е објавен на веб страната на Министерството за земјоделство.
Индискиот мултимилјардер планира да вложи преку 200 милиони евра во агрокомбинатот Џумајлија. Банкарската гаранција пак треба да се достави во рок од 15 дена, но во висина од 5% од вкупната вредност на предвидените инвестиции за првите 18 месеци, стои во договорот.
Според инвестицискиот план на Сахара Груп тие ќе вработеле 2000 лица, а планиратаат да изградат и фабрика за добиточна храна и млекарница со фарма од 20 илјади грла говеда.
Инвестициите ќе се одвиваат етапно а за 18 месеци, компанијата е обврзана да вложи 60 милиони евра и да вработи 900 лица.
-По влегување на сила на овој договор, во првите 18 месеци 8000 грла крави , а во рок од три години бројот треба да достигне до 20 000 грла крави. Понатаму закупецот е должен да има производство на млеко со капацитет на 80 000 литри на дневна основа, изјави Љупчо Димоски министер за земјоделство.
Индискиот бизнисмен синоќа пред заминување, на плажата пред хотелот Славија, сега Сахара Глобал организираше свечена вечера на која присуствуваше владина делегација предводена од премиерот Никола Груевски.
Индијците уживаа во македонската традиционална трпеза гравче тавче, ориз, пастрмка и охридска торта. Сето а тоа било придружено со индиска музика и настап на позната боливудска глумица и пејачка. Забавата ја збогатила и македонската ѕвезда Есма Реџепова.
Делегацијата на Сахара Индија Паривар утрово замина од Македонија.