Пред два дена на социјалните мрежи се појави видео на кое се гледа како од депонијата Дрисла се издига црн чад што предизвика паника меѓу граѓаните. Објаснувањето е дека се работи за дефект во филтерот кој беше инсталиран лани во април. Но, не се знае колку време работела печката додека го испуштала црниот чад. Во „Дрисла“ веќе биле државните инспектори за животна средина и на депонијата и дале рок од 15 дена да го поправи дефектот на филтерот.
Филтерот што е во дефект е инсталиран привремено, додека не стартува со функција новата печка, која треба да биде најсовремена за согорување на медицински отпад но која иако беше најавувана, се уште ја нема.
Директорот на депонијата Горан Ангелов во интервју за 1тв деновиве изјави дека за прблемот со филтерот е известено Министерството за животна средина, но тврди дека Дрисла не е загадувачот на Скопје.
Но, депонијата „Дрисла“ подолго време ја следеа контроверзии со италијанската компанија „ФЛЦ Амбиенте“ која беше избрана да го менаџира скопскиот отпад. Додека Коце Трајановски беше градоначалник на Скопје италијанската фирма двапати го добиваше тендерот, а тужбите на германската фирма „Шолц“ паднаа пред судовите.
-Тука мора да го посочам Управниот суд. Тој е генератор на ова што се случува ден денеска, игра еден пинг понг, прв -степен, втор степен, одлучувајќи по жалбите на италијанската, па на германската фирма. Слушајќи го градоначалникот ја сум убеден дека ќе се стави точка, со што ќе почне инвестицискиот циклус на Италијаните, вели Ангелов.