Државата повторно да го разгледа прашањето за статусот на луѓето кои се без лична документација и да се заложи за надминување на бариерите (административни, процедурални, финансиски) имајќи ја во предвид неукоста, недоволната информираност и економската немоќ на оваа група на лица, бараат невладините организации Амбрела и Национален ромски центар.
Од таму потенцираат дека проблемите со кои се соочуваат Ромите при пристап до фундаменталните права се многу, а без лична документација не е можна интеграција на Ромите, не е можно надминување на маргинализацијата и не е можно нивно зголемено учество во процесот на застапување за ефективни јавни политики и учество во процесите на носење на одлуки на локално и национално ниво.
„Бариерите поврзани со правниот статус на лицата без лична документација се уште поголеми за нивните потомци кои исто така не постојат и не можат да превземаат никакви правни дејствија и не можат ефективно да уживаат права. Ова значи дека проблемот е продлабочен и генерациски и тешко можат самите лица да ги надминат сите предизвици со кои се соочени при пристапот до лична документација, а кои се од финансиски, административен, семеен или некој друг аспект“, велат во овие невладини организации.
Во 2011 година, Министерството за труд и социјала заедно со МВР и Управата за водење на матичните книги на евиденција започна со спроведување на акција за идентификација на лицата кои што не се евидентирани во матичните книги.
Во рамки на проектот досега се регистрирани околу 550 луѓе без лични документи. Од нив најзагрозените Роми сè уште имаат проблеми со пристапот до социјални бенефиции поради нивниот недостаток на административна документација, велат во Амбрела и НРЦ.
Податоците на Народниот Правобранител февруари 2015 година покажуваат дека најголемиот број од децата на улица се припадници на ромската етничка заедница, а помал број се припадници на македонска и турска заедница.
Евидентирани се вкупно 233 деца на улица, од нив 113 се ромски деца. Има деца кои не се вклучени во образование, заради немање извод од матична книга на родени или пак надмината е возраста за вклучување во редовно образование.