Македонија ја заврши 2013 година со државен долг од 2,757 милијарди евра, односно 34,3 отсто од БДП-то. Ова е највисоко ниво на државен долг на Македонија од 2005 година, кога долгот бил 1,84 милијарди евра, но тоа тогаш било 38,4 отсто од БДП-то.
Според податоците на Министерството за финансии, во последните 5 години државниот долг е зголемен двојно, со оглед на тоа што на крајот на 2008 година тој изнесувал 1,38 милијарди евра, објавува Радио Слободна Европа.
Последната стратегија за управување со јавен долг на земјава е за периодот 2010-2012 година. Таа предвидуваше, државниот долг да не се зголеми над 30 отсто од БДП, а јавениот долг да не е повисок од 40 отсто од БДП. Сепак, ни оваа стратегија не беше испочитувана, со оглед на тоа што 2012 година заврши со државен долг од 34,1 отсто.
Власта, пак, од 2009 година одбива да го соопшти нивото на јавниот долг, а тоа не го стори ниту на неодамнешната собраниска седница на која опозицијата побара информација за висината, структурата, транспарентноста и намената на јавниот долг.
Пратеникот Марјанчо Николов од СДСМ тогаш рече дека податоците од извештајот за 2012 година за управување со јавниот долг покажуваат дека тој изнесува 45 проценти од БДП. На седницата не дојде ниту еден претставник од Владата, а пратениците од владејачкото мнозинство се бранеа дека Македонија е ниско задолжена земја.