Kреативниот директор на Њу Момент, Дракалски, стана дел од ТОП 30-те креативни директори во светот според интернационалниот ранкинг
PIAFYS за “сезоната“ 2013/2014.
PIAFS интернационалниот ранкинг на креативни директори ги рефлектира постигнувањата на најдобрите светски адвертајзинг фестивали. Топ фестивалите се поделени во три категории и секоја освоена награда на некој од нив носи определен број на поени.
Заклучно со 2 Јануари 2014 год., за PIAFS 2013/2014 ранкингот, во обзир се земени постигнувањата на следниве фестивали: Cresta Awards, Eurobest, Europe Cristal, Epica, Golden Drum, LIAA, Loerie, MIAF, Spikes Asia.
Со вкупно обезбедени 15.300 поени, Дракалски во новата 2014 година влегува рангиран на 30-тото место во светот, како дел од најдобрите креативни директори од најзначајните светски адвертајзинг агенции.
Приматот бр.1 креативен директор во светот го завзема Mescall John, креативниот директор на МекКен Австралија следен од неговиот колега Baron Pat кој е второпласиран.
Од регионот, најдобро котира креативната екипа на Saatchi&Saatchi Белград, составена од Вељко Голубовиќ, Драгана Петковиќ и Жарко Вељковиќ кои заедно го делат 12-тото место.
Во јули минатата година, спотот симболично наречен „10 метри одвоени – Ден на заедничка молитва“, на македонската агенција „Њу момент“ од Скопје, чиј креативен директор е Дракалски, беше добитник на „Канскиот лав“ (Cannes Lions) во категоријата „Титаниум – интегрирана кампања“. Ова беше првпат ваква висока награда од Канскиот фестивал да биде доделена на некоја држава од Балканот.
Маркетиншкиот „Оскар“, односно „Канскиот лав“, во Скопје го добија Сашо Пешев, генерален директор и партнер на агенцијата и Душан Дракалски, регионалниот креативен директор на „Њу момент“, кои вчеравечер се качија на победничката сцена во Кан, заедно со лауреатите од останатите 16 категории.
– Се потврди дека за еден сон да стане стварност, потребно е доволно долго да се сонува и многу напорно да се работи. Со оваа награда потврдуваме дека Македонија има вонсериски креативци и големи потенцијали, на кои доколку им се даде вистинската шанса, можат да се борат и да ги победуваат и најкреативните и најдобро платените во светот – вели Пешев.
Во регион како Балканот, исполнет со војни, омраза и нетолеранција, спотот го покажува вистинскиот напор на Христијаните и Муслиманите во Македонија да се доближат едни до други, вистински да се запознаат и да се разберат. Во релативно контроверзната тема на истовремено, заедничко верско молење на поповите и на оџите, меѓународното жири во Кан препозна идеја на која ѝ додели една од највисоките награди во светската индустрија на маркетингот.
– Шансата за освојување „Лав“ е 1:37000, повеќе шанса има гром да Ве удри. Но, пораката на оваа кампања е моќна, ова е нашиот придонес кон толеранцијата во нашата земја. Вистински луѓе направија реален чекор кон мир, разбирање, почитување едни кон други. Светот ја препозна тежината на овој гест и силината што спотот ја соддржи – изјави Дракалски.