Двајца министри во турската влада денеска поднесоа оставки, први по откривањето на големиот корупциски скандал кој ја тресе владата на премиерот Реџеп Таип Ердоган.
Турските министри за економија Зафер Чаглајан и за внатрешни работи Муамер Ѓулер денеска поднесоа оставки на функциите, веднаш по враќањето на премиерот Реџеп Таип Ердоган од патувањето во странство.
Синовите на двајцата министри се меѓу десетиците уапсени минатата недела во антикорупциска операција, и осомничени дека биле дел од голема мрежа која била вмешана во потпкуп и корупција.
Како што пренесува BBC, министерот за економија Зафер Чаглајан ги осудил апсењата во рамките на големата истрага за корупција, нарекувајќи ја „простачка операција”.
„Поднесов оставка на должноста министер на економија како би помогнал вистината да излезе на виделина и како би се расчистила оваа лоша завера која ги погоди моето дете и моите блиски колеги”, изјавил Чаглајан.
Турскиот премиер Реџеп Таип Ердоган дури се закани дека ќе има и „кршење на раце” на оние противници кои овие апсења сакаат да ги искористат за да ја поткопаат неговата власт.