Еден Италијан и еден Австриец, кои се наоѓаат на листата на патници на Боингот на Малезиа Еарлајнс кој исчезна со 239 патници над Кинеското Море, не се наоѓале во авионот а нивните пасоши биле украдени.
Луиѓи Маралди, 37 години, му се јавил на татко му во саботата наутро од Тајланд каде што се наоѓа и зборувал со татко му. Италијанската агенција Анса јавува дека таткото се слушнал со синот пред да ја чуе веста за авионот. Ова го потврди и италијанското министерство за надворешни работи.
Пасошот на Маралди бил украден уште минатото лето кога тој го пријавил во италијанската амбасада во Тајланд. Потоа се вратил во Италија каде што извадил нов пасош.
Кога италијанската полиција дошла кај родители на Маралди, токму родителите им ја соопштиле убавата вест дека нивниот син само што им се јавил и дека е жив. “Бевме спремни на најлошо затоа што секогаш е непријатно на луѓето да им се соопшти лоша вест. Но родителите на рекоа дека Луиѓи се јавил еден саат порано за да ги израдува откако чул дека во авионот имало италијански патник”, раскажува еден инспектор за Анса. Инспекторот и самиот се чул со Луиѓи кој му кажал дека е во Тајланд.
Истата авантура му се случила и на австријски државјанин чие што име не е објавено. “Ни се јави авио компанијата која ни рече дека еден патник бил регистриран со австриски пасош. По проверката утврдивме дека станува збор за украден пасош”, и изјавил на агенцијата АФП портпарол на австриското министерство за надворешни работи потврдувајќи дека се работи за жена на која пасошот и бил украден во Тајланд.
Се уште не се утврдени координатите на денеска исчезнатиот „Боинг 777, со 239 лица на него, а кој леташе од Куала Лумпур до Пекинг, соопшти сопственикот на авионот, малезиската компанија „Малезија ерлајнс“.
Во текот на истрагата нафтени дамки се забележани во близина на морскиот брег во крајниот јужен дел на Виетнам, за кои се претпоставува дека се првиот знак од исчезнатиот малезиски патнички авион, соопштија властите во Виетнам.
Дамките се со должина од 15 км и тие потсетуваат на дамки кои останале од гориво на урнат авион.