Вечерва на Плоштадот Македонија се одржа граѓански протест и помен по повод двегодишнината од убиството на Мартин Нешковски од страна на припадник на Министерството за внатрешни работи, а кое се случи додека на истото место и во исто време се славеше победата на владејачката партија ВМРО-ДПМНЕ на тогашните вонредни парламентарни избори.
Ова убиство ја крена ја крена на нозе демократската јавност, граѓанските активисти и невладините организации, кои упорно протестираа, барајќи одговорност од највисоките ешалони на власта, а особено од Министерството за внатрешни работи.
Директниот виновник, Игор Спасов, заврши зад решетки откако судовите му одредија казна од 14 години затвор, но неговите претпоставени и колеги сѐ уште се на своите работни места и функции.
Упорните протести ги дефинираа демократските капацитети на цела една генерација, која се калеше на улиците на Скопје и низ Републиката и која во следниот период треба да го понесе барјакот на демократијата во земјава.
Денеска таа генерација се собра повторно да изрази сочувство кон нивниот сограѓанин и пријател Мартин, но и да порача дека сѐ уште е тука и дека ќе продолжи да се бори за Македонија во која полицијата нема безумно да тепа, а политичарите нема да бидат глуви на демократските барања на граѓаните.