Франција е втора земја по ред во светот на која и се заканува опасноста од смртоносниот вирус ебола во наредните 18 дена, покажуваат најновите резултати од истражувањата. Прва земја на која и се заканува вирусот е Гана.
Истражувачите од Североисточниот универзитет во Бостон веќе неколку месеци спроведуваат истрага на основа на статистички податоци и неколку други параметри, како што се воздушните врски помеѓу земјите каде владее епидемија, потоа бројот на регистрирани случаи и периодот на инкубација, пренесува франуски „Фигаро“.
Франција е сега во значително поголем ризик за разлика од минатиот месец. Во резултатите од месец септември, таа беше седма на листата зад Гана и Велика Британија но пред САД.
– Од почетокот на септември веројатноста од појавување на еболата во земјите кои имаат значителни односи со Западна Африка како што се Франција и Белгија, постојано се зголемува, објаснуваат истражувачите.
Во меѓувреме во Франција се шири паника иако според експертите нема потреба за истото. Во парискиот регион Болоња многу родители вчера не дозволија децата да одат на училиште.
Вчера шпанските здравствени службеници потврдија дека заразена е болничарка која помагала во случај со ебола, додека американскиот камерман Ашока Макпо, кој за време на ангажманот во Либерија се зарази со ебола, е веќе пренесен на лечење во САД.
Досега како последица на смртоносниот вирус ебола загинаа околу 3.439 луѓе.