Едуард Филип е името на новиот премиер на Франција. Новата влада ќе биде именувана утре.
Претседателот Емануел Макрон чекаше десет дена од победата на изборите за да ги именува премиерот и новата француска влада.
Филип има 46 години, дипломиран од високата Национална школа за администрација, факултетот од кој излегуваат најголемиот број француски политичари.
Според портпаролот на Макрон двајцата политичари се согласуваат за многу прашања и се почитуваат.
Филип во младоста бил член на социјалистичката партија и близок до тогашниот премиер Мишел Рокард. Но, ја напушта партијата кога тогашниот пртседател на државата Франсоа Митеран му врти грб на Рокард. Филип бил разочаран од сите манипулации кои ги видел во оваа партија и одлучува да си замине.
Тој потоа станува близок со Ален Жупе и влегува во десничарската партија УМП која подоцна го смени името во Републиканци.
Филип е роден во Нормандија и беше градоначалник на Ле Хавр. Неговите родители биле професори по француски и со нив живеел и во Германија каде одел во гимназија.
Еден од неговите соученици од факултетот велат за него дека е «вистински центрист, симпатичен и духовит, пријател и со луѓето од десницата и со тие од левицата».
На почетокот на оваа изборна кампања тој застана до Франсоа Фијон но откако избија скандалите за семејните вработувања на Фијон тој одлучи да се повлече.
Филип се занимавал и со новинарство а има напишано и два романи – «Часот на вистината» во 2007 година и «Во сенка» во 2011 година. Двата романи се политичка фикција.
Француските медиуми потсетуваат дека Филип немал секогаш убави зборови за Макрон: «За некои, импресионирани од неговата моќ на атракција и неговата реформаторска реторика, тој е наследник на Кенеди и Мендес Франс. Првиот имаше повеќе каризна а вториот повеќе принципи», напиша Филип за Макрон во Либерасион во јануари 2017 година.
Но тоа не го спречува да има почит кон Макрон па така во септември 2016 година напиша дека Макрон е симпатичен и исклучително интелигентен: «Ставовите на Макрон и моите се совпаѓаат во 90 отсто случаи», напиша Филип пред повеќе од една година. Овие негови ставов иго ослободуваат од сомненијата дека е опортунист кој се доближил до Макрон кога сфатил дека тој ќе стане претседател.