Европската комисија (ЕК) одлучи да почне со нов пристап за помош на економиите на Балканот. Оваа иницијатива денес ја најави комесарот за проширување Штефан Филе од Лондон, каде што беше еден од главните учесници на конференцијата на Европската банка и реконструкција и развој.
На оваа конференција учествуваше и премиерот Никола Груевски заедно со другите премиери на земјите кои се надеваат на влез во ЕУ.
ЕК смета дека ниту една балканска земја не е функционална пазарна економија.
“Невработеноста насекаде во регионот е висока. Особено кај младите. Јавните дефицити и нивоата на долгови се зголемуваат”, рече Филе додавајќи дека “пречка за компетитивноста е често политизацијата на одлуките кои треба да биде пазарно раководени”. Оттука потребни се кредибилни реформи кои треба да ги поддржат и приватниот и јавниот сектор.
Според Филе, целта на овој нов пристап, кој беше најавен и во октомврискиот годишен извештај за напредок на Балканот кон ЕУ, е поддршка за земјите кои сакаат да отворат работни места и да го зајакнат развојот. ЕК смета дека и балканските земји треба да го искористат искуството на земјите од ЕУ: “Ние имаме искуство – сакаме и вие да го искористите веднаш”, рече Филе.
Според планот на ЕК, потребна е реформа на јавните финансии, институциите на пазарот на работна рака и на административните товари кои му пречат на бизнисот а потребно е и вистинско инвестирање во образованието. Сето тоа не може да се спроведе без правна држава која ќе им даде доверба на инвеститорите.
Прво, за инвестиции, потребна е макроекономската, даночна и финансиска стабилност. ЕК сака да влезе во структурни реформи со балканските земји за да постигне бараното. Сето тоа заедно со Меѓународниот монетарен фонд (ММФ) за да се донесат препораки за секоја земја кои ќе бидат еден вид водич за реформи.
Од секоја земја ќе се бара да направи нацрт план за менаџирање на јавните финансии кој може да биде поддржан од страна на ЕК.
Потоа, од секоја земја ќе се очекува да даде, секоја втора година, своја анализа за структурните реформи за најважните сектори како транспортот, енергија и образованието.
Ова, вели Филе, ќе биде патоказ за инвеститорите како и каде да го вложат своите пари.
Комесарот Филе побара од премиерите на Балканот да го прифатат планот на ЕК за да ја подобрат ситуацијата во нивните земји.
Повеќе детали за планот се очекуваат утре.