Македонија и оваа година ја задржува својата препорака за почеток на преговори за членство, вели висок европски функционер. Извештајот ги употребува зборовите “ќор-сокак” и “назадување” и ја повикува владата да ги реши итните реформи. Препораката што ќе биде објавена утре е условена со напредок во независноста на судството и слободата на изразувањето.
За Европската комисија (ЕК) оваа условена препорака е “одлучен чекор за да се решат прашањата на засилената политизација и растечките недостатоци во независноста на судството и слободата на изразувањето за да може препораката да остане одржлива и во наредните години”, е точната формулација на утрешниот извештај за нашата земја која НОВА успеа да ја прочита.
Поради кумулативниот напредок во минатото, земјата се уште ги исполнува Копенхашките критериуми, вели извештајот.
Брисел во утрешниот извештај, од Македонија и Албанија бара заедничка одговорност и на владата и на опозицијата за да се работи во демократски институции. ЕК смета дека не е добро за демократијата што опозицијата не е во инстутициите и што делува на улица.
На крајот на петгодишниот мандат на комесарот за проширување Штефан Филе, Европската комисија (ЕК) смета дека состојбата во Македонија упорно се влошува и уверена е дека решавањето на спорот со името може да донесе напредок во земјата. Но, за жал, високиот функционер со кој разговаташе НОВА тврди дека оваа институција “не е многу добра за решавање на билатералните прашања помеѓу земјите членки и кандидатите”.
“Не сме екипирани за тоа. Но билатералниот спор треба да се реши. Треба да се гледа како да им се промогне на двете страни и како кандидатот да го решава прашањето на конструктивен начин. Треба да најдеме начин како да им помогнеме на ОН и на другите институции кои тука можат да помогнат.
Во тој процес со Македонија во ОН, кој трае веќе 19 години, мислам дека е легитимно да се постави прашањето што е тоа што не е добро во преговачката рамка и дали треба да најдеме нов момент во тие преговори. Да најдеме дипломатска верзија на она што е напишано во извештајот и препораката.
ЕК не е причина што не е најдено решение за спорот со името. ЕК не е причина што има назадување во реформите. Назадување и ќор-сокак се зборовите што ќе ги најдете во извештајот за Македонија. Ние не сме одговорни за двете големи кризи во Македонија. Ние бевме тие кои најдовме решение за првата криза со договорот од 1 март 2013 година. Ние не го натеравме ОБСЕ по трет пат да каже дека има сериозни проблеми во изборите, и законодавни и процедурални проблеми.
Веќе пред две години во 2012 година ја воведовме идејата дека спорот за името може да биде решаван во рамки на самите преговори и со тоа да креира елан за Скопје за да се реши спорот. Истовремено тоа ќе креираше гаранции за сите земји членки, не само за една земја членка, дека процесот на пристапување ќе продолжи само ако има принципиелен договор за името. Ја презентиравме оваа и други идеји на земјите членки.
Всушност презентиравме цел пристап за процесот на пристапување. Немаше позитивни реакции од земјите членки на нашите препораки кои можеа да имаат позитивно влијание врз реформите и стабилноста на земјата и на целиот регион а тука не смее да се заборават и меѓуетничките односи во земјата. Јасно ставивме на знаење дека влезот на земјата во НАТО и ЕУ е лепакот кој може да го задржи двете заедници заедно.
ЕК излезе и со идејата за Висок политички дијалог. Се обидовме да и објасниме на земјата дека отсуството на решение за името не е извинување да не се реформира. На крајот, земјата е таа која треба да ги искористи можностите кои и се пружаат и да си помогне самата себе си”, вели нашиот висок и добро информира извор во ЕК.
Според него “во наредните пет години ЕК нема никакви шанси да ги реши спорот. Но, земјите членки имаат многу шанси да го решат спорот”.