Економијата заздравува, буџетот стабилен – 2021 година на економски раст

2021 година ќе биде година на економско заздравување и раст. Тоа го навестуваат добрата кондиција на буџетот во првиот квартал и позитивните трендови што се препознаваат. Ваква е оценката на претседателот на Владата на Република Северна Македонија Зоран Заев кој вели дека ваквите текови се должат на преземените мерки, но и на довербата на деловната заедница во мерките кои овозможија стопанството да не работи во грч туку да ја следи бизнис логиката дури и во услови на криза.

Посочи дека владиниот стимул придонесе за двојно амортизирање на економскиот пад лани, поточно, според калкулациите на Министерството за финансии е амортизиран за 4,2 процентни поени и наместо пад од -8,7 отсто реалниот пад на економијата лани беше -4,5 проценти.

Премиерот потенцира дека согласно последните макроекономски и фискални движења и очекувањата во однос на меѓународното економско окружување, домашната економија е предвидено да се врати на патеката на економски раст во 2021 година и да ги надмине шоковите предизвикани од пандемијата.

– Ние сме реални и свесни дека пандемијата трае. Фокусирани сме на заздравување на економијата и затоа постојано комуницираме со бизнис заедницата, вели министерот за финансии Фатмир Бесими. 

Сепак петтиот пакет економски мерки кој требаше да даде ветер во грб за ваквите најави се уште е заглавен во Собраниските процедури од илјадниците амандмани поднесени од албанската опозиција која користејќи ја ситуацијата врши притисок да се реши проблемот на лицата без државјанство.

Позитивни тонови во таа насока стигнаа од претставниците на власта од каде соопштија дека за понеделник закажана е нова средба со претставниците на Алијанса за Албанците и Алтернатива, а премиерот Зоран Заев рече дека на таа средба очекува да биде постигнат договор, а со тоа и деблокада на Собранието.

Во насока дека се навестува решение е и денешната изјава на министерот за финансии Фатмир Бесими кој рече дека до 15 април очекува да легнат средствата на сметките на компаниите кои аплицирале за економска помош од државата за исплата на плати на работниците.

Бесими рече дека со наредната исплата ќе се ослободат средства за плати и за месец февруари и за месец март.

Меѓувреме со изјава излезе и вицепремиерот за економски прашања Фатмир Бесими кој најави дека Владата ќе усвои нови мерки со кои ќе се помогнат операторите кои поради одлуката за нивно затворање во наредните две недели ставија клуч на врата и трпат економски загуби.

Рече дека за споредба ќе се земат неколку месеци како репер за да може да се пресмета колку пари би заработило доколку би работеле и врз основа на тоа да им се исплатат средства за помош.

За рестораните кои организираат свадби рече дека се најзагрозени од сите угостителски дејности и посочи дека средства за нив ќе бидат опезбедени преку Ковид 4 програмата во форма на бескаматни кредити и грантови но истакна и дека ќе постои и опција за неповратни средства од државата секако доколку бидат исполнети одредени услови.