Илјадници животни кои се во фаза распаѓање по поплавите во Босна и Херцеговина може да предизвикаат појава на заразни болести, како што се антракс, беснило, и многу другизаразни болести кои се пренесуваат на човекот, предупредија претставниците на Ветеринарната комора на БиХ, на вонредната конференција. Тие потенцираат дека државата нема ниту еден голем крематориум за животни за да може да се отстрани угинатата стока.
– Ние не сме во состојба да одговориме на таа ситуација. Цивилната заштита има два крематориума, едниот со капацитет од 50, другиот од 200 килограми. За да се загрее треба да се стави 16 литри гориво на саат. Ние не сме во состојба да одговориме на таа ситуација. Хрватска и Србија ни понудија одредена помош за спалување на угинатата крупна стока. Одреден број угинати грла е испратен кон Србија, каде ќе бидат спалени, рече деканот на Ветеринарниот факултет Нихад Фејзиќ.
Тој истакнал дека биле усогласени пет мерки кои итно мора да се преземат со цел спречување на ширење на заразата.
Ветеринарниот факултет ќе ги стави на располагање своите лаборатории за проверка на безбедноста на храната од животинско потекло и лабораторија за сточната храна, со напомена дека се очекува појава и на афлатоксин во житарките, по што и во млекото.
Иако на терен веќе се врши дезинфекција и дератизација тие предупредуваат на можна појава на глувци. Голема опасност преставува и топлото време бидејќи сега лешевите се распаѓаат побрзо, а заразните болестите се шират повеќе предупредуваат експертите.
-Мора да се набават евтини средства за дезинфекција, вар, сода и да се запалат животните. Не може да чекаме Еврпа да ни испрати крематориум, веднаш треба да делуваме, објаснува Фејзиќ.
Дополнителен регионален проблем се комарците кои се преносители на овие болести.