Екстра меин ја обвинува Директорката на Центарот за јавно здравје во Велес Флорентина Ристовска Шурбевска дека ги фалсификувала документите во постапката за испитување на бактеријата листерија. Од компанијата тврдат дека на посочениот датум на 23 јули, кога е најден спорниот свински врат, во маркетот во Гевгелија воопшто немало вакумиран сецкан свински врат од Екстра меин.
“Согласно Решението на Министерството за здравство, Државен санитарен и здравствен инспекторат во Подрачното одделение во Гевгелија, се наведува дека на 23 јули 2014 година е извршен Инспекциски надзор во гевгелиската Компанија АЛДИ ЕМ Плус. Ова, наводно, е маркетот од каде што е земен спорниот примерок за анализи на сечкан вакумиран свински врат од производителот Екстра Меин.
Понатаму, дека инспекцискиот надвор врз овој маркет е извршен на 23 јули 2014 година, се потврдува и во Известувањето до Министерот за здравство Никола Тодоров, испратено од ЈЗУ Центар за јавно здравје од Велес, а потпишано од директорката Флорентина Ристовска Шурбевска.
На посочениот датум на 23 јули, во наведениот малопродажен објект во Гевгелија воопшто немало вакумиран сецкан свински врат од Екстра меин. Прв датум кога од страна на дистрибутерот во посочениот објект е доставен за продажба вакумиран свински врат е 24 јули 2014 година“, се тврди во писменото соопштение на компанијата.
Од Екстра меин објавуваат документи од кои, како што велат, станува јасно дека Ристовска Шурбевска е една од најодговорните во фалсификувањето на постапката и на документацијата.
-Тоа е вистината! А таа ја поткрепуваме и со фактури-испратници од нашиот дистрибутер кон малопродажниот ланец. На увид на јавноста и ставаме се што било дистрибуирано од производите Екстра Меин во продавницата! Дури, испраќаме и фактури -испратници од 21 јули од кои што е повеќе од очигледно дека нема достава на вакумиран сечкан свински врат!!!
-Врв на фингирањето на случајот граден врз Екстра Меин е резултатот од тестирањето на спорната мостра во Центарот во Велес, каде што потписничката на документот Шурбевска наведува дека датумот на земањето и на приемот на мострата е на 25 јули, 2014 година!
Покрај овој факлсификат, Шурбевска треба да му објасни на министерот Тодоров, на македонската јавност, но и на Јавното обвинителство, меѓу останатото, каде била мострата во овие два критични дена. Настрана што се уште стои отворено прашањето од каде, како и кога е земена спорната мостра!
Сите документи од наша страна се доставуваат и до Јавното Обвинителство!“се вели во соопштението на Екстра меин.
