Сите производи на Екстра меин ќе бидат повлечени од продажба, а фабриката останува затворена, соопшти денеска Комисијата за заразни болести на чело со министерот Тодоров. Инспекторите откриле дека листерија има во свинското и пилешкото месо од кои наводно, се правеле сувомеснатите производи.
Месото било увоз од Бразил и Канада. На денешната прес конференција министерот Тодоров не објасни зошто се дозволило заразаено месо да биде увезено во државата, но и кој ќе сноси одговорност за овој пропуст.
Ова ја отвара дилемата колкав е списокот на фабрики за сувомеснати производи кои користат месо од Бразил. Според овој документ до кој дојде НОВА, а кој Институтот за јавно здравје го испратил за генотипизација до лабораторијата на Факулетот за ветеринарна медицина, дури во 23 производители на сувомеснати производи е пронајдена листерија.
-Тоа е точно, но кај овие производители не е пронајдена бактеријата листерија во толкави количини и не е од истиот генотип како во Екстра меин, изјави Тодоров.
Прашање кое се наметнува после ова е дали граѓаните треба да конзумираат производи со листерија која не е од исиот генотип како онаа во Екстра меин, а ја има во помали количини кај други производители. Подоцна на истата прес конференција Тодоров изјави дека во производите не треба да има ниту една колонија од бактеријата бидејќи таа понатаму се размножува во производите во маркетите.
На прес конференцијата присуствуваа сите инволвирани институции кои досега се препукуваа меѓу себе околу тоа, чија метода е валидна.
Оние што до пред два дена тврдеа дека е промашена методата на Институтот за јавно здравје сега се смееја на новинарски прашања, особено кога министерот Тодоров се обидуваше да објасни за нешто, како што рече, повторно да не бидело погрешно интерпретирано од новинарите.
Нејасно е, како можат претставници на така значајни институции од највисок ранг во државата да се смеат на новинарски прашања, особено кога станува збор за многу сериозна тема, бактерија која уби пет луѓе и десет заболеа.
Особено, раководителот на лабораторијата како и деканот на Факултетот за ветринарна медицина кој си ја демантираше сопствената изјава, за тоа дека промашена е методата на нивната конкурентна институција, Институтот за јавно здравје. Тие денеска климаа со глава во знак на одобрување на изјавата министерот и се смееја на новинарските прашања.