Методата за генотипизација со која што компанијата Екстра Меин беше прогласена за виновна не е акредитирана, тврдат за НОВА од компанијата.
-Освен, сомнителниот начин на кој што е земена мострата од Гевгелија и доцнењето од два дена за да биде доставена во лабораторијата во Велес, како и ненаправената квантификација (броење на бактериите) на колониите на листерија,излезе на виделина и методата за генотипизација дека воопшто не е акредитирана, обвинуваат од Екстра меин.
Од оваа компанија во чиј производ сецкан свински врат надлежните тврдат дека е пронајдена опасната листерија, остро реагираат на изјавата на претседателот на Комисијата за заразни болести болести Звонко Миленковиќ дека квантификацијата( броењето на бактериите) не е од пресудно значење кога е направена генотипизација.
Нивната реакција ја објавуваме во целост.
„Почитуван Д-р Sвонко Миленковиќ, Претседателе на Комисијата за заразни болести: Вие изјавивте дека за наводно позитивната мостра на Компанијата Екстра Меин, најдена во примерок земен од малопродажба во Гевгелија, а можеби и во Негорци, е направена квантификација
Со сета почит кон Вашата титула, тоа го демантира резултатот добиен од Центарот за јавно здравство во Велес, потоа Факултетот за ветеринарна медицина, како и Агенцијата за храна и ветеринарство!
Претседателе, како тогаш мострата за која не е направена квантификација ја земавте како позитивна? Дали е тоа етички и правно издржано?
Понатаму, Вие изјавивте дека листерија е пронајдена во четириесетина производи, но дека најголемиот дел подлежат на термичка обработка, а дека само во еден, чадениот сецкан вакумиран свински врат на Екстра Меин е во производ готов за консумирање. И непотребно ја ставивте нашата Компанија на столбот на срамот!
Од друга страна, Министерството за здравство објави резултат во кој убаво пишува дека се пронајдени повеќе производители, во повеќе производи готови за јадење, во кои има листерија. Ама не ги објавивте! Зошто? Дали Претседателе, ова значи дека имате повеќе аршини по кои Вие постапувате? Не сакаме да веруваме дека тоа е тенденциозно, но резултатите укажуваат на тоа!
Згора на тоа, денеска изјавувате дека не е битна квантификацијата кога сме имале генотипизација?!? И тоа како е битна, ако не и најбитна!
Претседателе, би требало да знаете дека квантификација се прави за да се определи инфективната доза за инфицирање на конзументот, а согласно Правилникот за посебни барања што се однесуваат на микробиолошки критериуми на храната, инфективната доза е 100 колонии на еден грам! Инаку, зошто тогаш би била воопшто ставена во Правилникот?
Ако на тоа се додаде изјавата на директорката на Центарот за јавно здравје во Велес, Флорентина Ристевска-Шурбевска дека тие таму направиле квантификација, ама не ја квантифицирале во Извештајот, затоа што брзале да издадат документ дека ја има за да може да се реагира за доброто на граѓаните станува збор за врвен волонтеризам кој што, сосема обратно, е на штета на граѓаните!
Понатаму, Претседателе на Комисијата за заразни болести, дали Вие знаевте дека методата за генотипизација на Ветеринарниот Институт во Скопје – НЕ Е АКРЕДИТИРАНА? А постојано се повикувате на неа!
Кој сега ја направи штетата и, конечно, кој ќе одговара за штетата? Прекинете со импровизации, фатете се со работа и барајте ја листеријата на вистинското место!