Енвер Малиќи е добитник на признанието „личност на годината во сферата на врвно хотелиерство“ на првите „Story Awards“ во Македонија, кои се одржаа вчера во организација на издавачката компанија „Колор медиа плус“.
Малиќи е еден од најуспешните бизнисмени во Македонија. Иако животот и обврските го носеа на различни страни од светот, на крајот секогаш се враќаше дома, за неговата групација да ги имплементира сите светски трендови во своето работење, а токму поради Парк хотел&спа, кој дава голем придонес во општата слика на угостителството во нашата земја, тој вчера беше награден.
Наградата на господинот Енвер Малиќи му ја врачи претседателот на „Колор прес група – Србија“, која е издавач на најчитаното селебрити-списание во регионот „Story“, господинот Роберт Чобан.
– Особено ми е драго што обезбедив место во градот токму за сите овие луѓе што ги гледам во публиката и меѓу добитниците на „Story Awards“ – порача господинот Малиќи по примањето на престижната награда.
Инаку, компанијата „Гемак трејд“, чиј сопственик е господинот Малиќи, е присутна веќе 25 години, водена од иновација, храброст и интегритет, за да биде тоа што е денес, успешна компанија во секторот на увозот и дистрибуцијата. Водена од своите корпоративни вредности, „Гемак трејд“ стана една од најголемите компании за увоз и дистрибуција на пијалаци, тутунски производи и храна. Компанијата е ексклузивен стратешки партнер на светски најпродаваните брендови, а воедно го прошири своето работење во доменот на недвижности и угостителство.