Сите институции на ЕУ, НАТО и САД се на иста бранова должина кога станува збор за македонската ситуација.
“Ваква хармонија во ставовите речиси и да немало во друг случај”, вели Иво Вајгл, евро-парламентарниот известувач за Македонија.
“Со оглед на единственоста на ставовите никој не може да му каже на македонскиот соговорник ништо друго освен заедничкиот став – а тоа почитување на резултатот на изборите што беа меѓународно признаени, резултат кој му дозволува на новото парламентарно мнозинство да формира влада”, вели тој.
Тој смета дека настаните од 27 април не се само срам за Собранието и македонската политика туку се и предупредување за македонските политичари дека е последен момент да се вратат на патот на демократијата.
Истовремено, десничарот Едвард Кукан, социјалистот Кнут Флекенштајн и либералот Иво Вајгл од Европскиот парламент (ЕП) денес ќе побараат од новиот претседател на Собранието Талат Џафери веднаш да ги преземе сите функции во законодавниот дом кои му припаѓаат и веднаш да започне со работа Собранието.
Тие исто така ќе го повикаат ВМРО-ДПМНЕ да престане со опструкциите врз работата на Џафери а Горѓе Иванов да престане, и тоа веднаш, со опструкции врз демократскиот процес во Македонија.
А сите политички партии и нивните лидери да договорат средба и конструктивна соработка за примена на договореното во Пржино пред речиси две години.
Тие исто така ќе повикаат за целосна истрага на настаните на 27 април во Собранието.
По две одлагања во март и април, неделава требаше да биде ставена на гласање резолуцијата на ЕП за Македонија чиј што автор е Вајгл но тоа нема да се случи:
“Мојот предлог е гласањето да биде ставено на дневен ред во ЕП кога ситуацијата во Македонија ќе се нормализира и до изборот на новата влада. Во таа резолуција се зборува за реформи кои треба да ја приближат Македонија до преговори за членство во ЕУ. Резолуцијата е стимуланс за работа врз реформи за политичките партии а тоа во овој момент го нема”, вели Вајгл.