Дали децата на возраст од 12 до 16 години во земјава ќе треба да ја примат вакцината на „Фајзер“ пред да се вратат во училишните клупи? Ваква анализа летово ќе прават експерти од Комитетот за имунизација, најави министерот за здравство, Венко Филипче. Тој вели дека епидемиолозите од Комисијата за заразни болести пак ќе треба да ги подготват протоколите за враќање на учениците во училишните клупи.
„Комисијата за заразни болести во текот на следните месеци ќе изготви протокол со препораки за тоа како ќе се одвива следната учебна година, како ќе се одвива наставата во една училница, со колкав број на ученици, насоки за проветрување и циркулација на воздух… “, рече Филипче.
Во однос на наставата со физичко присуство и премиерот Зоран Заев вели оти тој лично е на став дека децата треба да се вратат во училиште, но крајниот збор сепак ќе го има здравствената Комисија.
„Најважно е каква ќе биде состојбата кон крајот на август. Сепак, јас лично сум за настава со физичко присуство. Мислам дека ќе имаме стабилна состојба и сега ова, кога бројките се намалени, би требало да биде добра основа за настава со физичко присуство. Ако потоа има потреба ќе одиме со затварање или други мерки“, рече Заев одговарајќи на новинарско прашање.
Инаку, неодамна компанијата „Фајзер/Бионтек“ соопшти дека вакцината против ковид-19 од нивно производство е безбедна и до 100 процнети ефикасна кај деца од 12 до 15 години. Студијата била спроведена на 2.260 доброволци во САД.
Надлежните кај нас велат дека, доколку се утврди оти оваа вакцина може да се дава кај деца на возраст над 12 години, за имунизација ќе се користат количините кои земјава веќе ги има обезбедено, како од производителот, така и оние кои треба да стигнат преку Ковакс механизмот.
Билјана Божиновска