Претседателот на Турција, Реџеп Таип Ердоган го осуди нападот на Ататурк аеродромот во Истанбул и ги повика лидерите од светот да заземат цврст став против тероризмот. Според него, се работи за напад чија цел е да ја омаловажи Турција.
– Јасно е дека целта на овој напад не е да се постигне некаков резултат туку да се креира пропаганда против нашата земја едноставно користејќи ја крвта и болката на нашиот народ, порача Ердоган.
Во меѓувреме бројот на загинатите се искачи на 41, а на повредените на 239. Според турските власти меѓу загинатите има 10 странски државјани, од кои тројца се со двојно државјанство.
Премиерот Бинали Јилдирим претходно рече дека напаѓачите пристигнале на аеродромот со такси и почнале да пукаат пред да се разнесат со самоубиствени елеци.
Турската јавност смета дека ИСИС е одговорен за нападот.