Реџеп Таип Ердоган освои нов петгодишен мандат откако обезбеди победи во првиот круг од претседателските избори што се одржаа вчера, соопшти претседателот на државната изборна комисија, Сади Гувен, кој рече дека актуелниот претседател “добил апсолутно мнозинство од сите валидни гласови”.
Според државните медиуми Ердоган освои 53 отсто, на преброени 99 отсто од гласовите, а неговиот најголем ривал Мухарем Инџе 31%.
Опозицијата, која се уште официјално не ги призна резултатите, соопшти дека ќе продолжи со својата демократска борба “без разлика на резултатот”.
Претходно, од опозициската Народна Републиканска партија искажаа соменвање во резултатите што ги емитуваа државните медиуми, нарекувајќи ги манипулација. Конечните резултати ќе бидат објавени во петок.
– Нацијата ми довери одговорност за претседавање и извршни должности, изјави 64-годишниот Ердоган во говор од Истанбул што го пренесуваше државната телевизија.
Тој прогласи и победа на Народниот сојуз, изборна коалиција на неговата Партија на правда и развој и малата Партија за национално движење на парламентарните избори, нагласувајќи дека имаат мнозинство во Парламентот во кој има 600 места.
– Се надевам никој нема да се обиде да фрли сенка на резултатите и да и наштети на демократијата за да го сокрие својот неуспех, изјави Ердоган.
На парламентарните избори Партијата за правда и развој доби 42,68 отсто гласови додека главната опозициска Народна републиканска партија освои 22,55 отсто гласови. Сојузникот на Ердоган, Партијата за национално движење доби 11,28 отсто гласови. Прокурдската Народна демократска партија освои 10,94 отсто гласови со што надмина цензус за влез во Парламентот.
Што значи резултатот?
Ердоган овој пат како претседател ќе има поголеми овластувања според новиот Устав на Турција, измени што беа усвоени на референдумот минатата година со 51 отсто од гласачите и треба да стапат на сила по изборите.
Тие вклучуваат:
-директно назначување високи јавни функционери, вклучувајќи министри и потпретседатели
-моќ да интервенира во правниот систем на земјата
-моќ да воведе вонредна состојба
Некои критичари тврдат дека ова значи премногу моќ во рацете на една личност и дека новиот претседателски систем во Турција нема контрола и баланс преку други тела, како што е во Франција или САД.
Ердоган пак тврди дека зголемена власт ќе му овозможи да одговори на економските проблеми на Турција и да ги победи курдските бунтовници на југоисточниот дел на земјата.
Во својот победнички говор, тој рече дека Турција ќе дејствува поцврсто против терористичките групи и ќе продолжи да ги “ослободува сириските територии”, за да можат бегалците да се вратат во своите домови таму.
Овие избори требаше да се одржат во ноември 2019 година, но Ердоган ги свика порано.
Ердоган беше премиер 11 години пред да стане претседател во 2014 година. Според новиот Устав, тој може да се кандидира за трет мандат, откако неговиот втор мандат ќе заврши во 2023 година, што значи дека потенцијално би можел да ја задржи власта до 2028 година.