Европската унија планира да создаде меѓународен суд, кој ќе се занимава со злосторствата извршени од страна на припадниците на поранешната ОВК, за време на војната во Косово во периодот 1998-1999 година, јави БТА.
Судот се очекува да почне да работи следната година, изјави неименуван висок претставник на ЕУ, додавајќи дека надлежностите и правилата на работа се уште се предмет на дискусија со косовските власти.
– Трибуналот симболично ќе има седиште во Косово, но повеќето клучни процеси, како и сведочењата ќе се одржуваат во Холандија – изјави претставникот на ЕУ, нагласувајќи дека спогодбата за формирање на оваа судска инстанца треба прво да биде одобрена од косовскиот Парламент.
Судските истраги за злосторствата извршени од страна на припадниците на ОВК, како во Косово, така и пред Хашкиот трибунал беа попречувани поради закани кон сведоците и нивните семејства.
Новиот суд ќе биде формиран и финансиран од ЕУ. Тој ќе се занимава со тврдењата за учество на членовите на ОВК во трговијата со органи на заробени Срби и лица од друга националност за време на конфликтот во 1999 година и со исчезнувањето на околу 400 лица, од кои повеќето косовски Срби, кон крајот на војната.
Истрагата на американски обвинител, која треба да заврши до средината на јуни, ќе ја создаде основата за покренување обвиненија пред судот.