По скандалот со Сноуден кој ги откри прислушувањата на САД но и на некои големи европски земји кои исто така прислушкуваат, ЕУ смета дека и таа треба да има разузнавачка агенција.
Ова го изјави потпретседателката на Европската комисија (ЕК) Вивијан Рединг која е комесар за правда.
Рединг ова го изјави во интервју за грчкиот весник “Нафтемпорики” велејќи дека 28 земји членки на ЕУ треба да ја зајакнат соработката помеѓу тајните служби и да имаат еден глас кога разговараат со САД во оваа област.
“Мојот предлог е да се креира европската разузнавачка служба во 2020 година”, вели таа но додава дека идејата за сега не била разговарана во рамките на ЕК.
ЕУ има служба ИНТЦЕН (Центар за анализа на разузнавање) и во нејзините рамки има размена на некои информации. Оваа служба се наоѓа во рамките дипломатскиот сервис на ЕУ.
Пред повеќе години беше лансирана идејата да се креира еден вид европска ЦИА но предлогот не беше реализиран пред се затоа што големите земји членки не сакаат да споделуваат со партнерите во оваа област. Идејата беше на Австрија и Белгија и беше лансирана по атентатот во Мадрид во кој загинаа 200 луѓе.
Минатата година беше споменуван и проектот за служба во која ќе се соберат сите агенции на ЕУ кои се бават со оваа област како Еуропол. Еуџаст, Фронтекс итн) но и овој проект не беше реализиран.
Според експертите креирањето на ваква агенција бара промена на повелбата на ЕУ и не би можело да се почне со негова реализација пред изборите во ЕУ во 2014 година.
Сепак, засега нема знаци дека земјите членки на ЕУ би прифатиле ваков предлог сличен на оние досега одбиени.