Од болницата „Еуроиталија“ тврдат дека се невистинити тврдењата на медицинскиот персонал дека не биле претходно информирани од страна на раководството дека ќе бидат испратени на принуден одмор и тврдат дека одлуката била закачена на огласна табла, а бидејќи не сакале да ги примат решенијата им биле пратени по пошта
Од болницата „Еуроиталија“ тврдат дека се невистинити тврдењата на медицинскиот персонал дека не биле претходно информирани од страна на раководството дека ќе бидат испратени на принуден одмор. Полномошникот, адвокат Трајче Саздов кој ја застапува болницата бидејќи сопстеникот Алберто Де Лука живее во Италија, информира дека тоа е сторено по прогласувањето на вонредната состојба на 20 март годинава.
„ Самиот документ Одлука за испраќање на вработените на принуден одмор поради настанатата состојба со вирусот која воедно е донесена со согласност на Медицинскиот директор на установата беше видно истакната на огласна табла (истата ја доставуваме во прилог на ова известувањето). Работниците одбиле да ги примат решенијата, па заради тоа истите се испратени по пошта со цел уредно да бидат примени, како би можеле да го остварат своето право на приговор кое им е загарантирано со закон“, се вели во соопштението од Еуроиталија.
Понатаму во текстот се вели: „Би сакале да потенцираме дека согласно податоците на Светската здравствена организација Италија е една од најподените држави од КОВИД-19 вирусот со 178.000 случаи на заболени до моментот и преку 23.000 починати лица, но и со големи финансиски загуби во економијата, за што ќе следи подолг период на опоравување. До настанување на кризата заради пандемијата од КОВИД-19, на сите вработени во ПЗУ ЕУРОИТАЛИЈА Општа Болница – платата е редовно и навремено исплаќана и менаџментот на болницата се надева дека набрзо ситуацијата ќе се нормализира и дека вработените ќе продолжат со редовно извршување на работните обврски и задачи.
Сакаме да истакнеме дека во болницата нема инфективно одделение и вработени лекари инфектолози, ниту пак е направена некаква обука за работење во ваква состојба од страна на надлежните институции на медицинскиот персонал, па евентуалното работење со полн капацитет и со пациенти кои ги имаат симптомите на КОВИД-19 би можело само да го загрози здравјето на другите пациенти, како и на вработениот медицински персонал. Со цел да се излезе во пресрет на пациентите и покрај намалениот интензитет на работа, болницата гарантира 24 часовна здравствена заштита, организирана во дежурства.
До овој момент немало никакви најави за мерки од страна на надлежните институци и кои би го поддржале и помогнале работењето на приватните здравствени установи кои во овој период имаат намален број на пациенти или воопшто немаат пациенти заради препораките да се третитараат само итните и неодложни случаи.
Исто така, важно е да нагласиме дека ПЗУ ЕУРОИТАЛИЈА СКОПЈЕ не користи средства од државата како други приватни здравствени установи кои се дел од мрежата на здравствени установи и дека се финансира единствено од сопствени приходи, а доколку надлежните инситуции сметаат дека имаат потреба од капацитетите на здравствената установа може да понудат истата да стане дел од мрежата на здравствени установи и да склучи соодветен договор со Фондот за здравстено осигурување, како би се уредил начинот на финансирање.“, се вели во соопштението од болницата Еуроиталија, потпишано од Адвокат Трајче Саздов.
Медицински персонал во НОВА се жалеше дека се испраќаат на привремен принуден одмор и дека Решенијата ги добиле по пошта, без претходно да бидат информирани. Реагираше премиерот Спасовски кој најави дека мора да се испита случајот и дека „секој вработен е важен и никој не смее да профитира во оваа ситуација“.
По ова ДСЗИ направи вонреден инспекциски надзор, а вработени најавија дека ќе се обратат и до Трудовата инспекција. Се пожалија дека немаат земено плата за март, ниту К-15 за минатата година. А со Решенијата дел од персоналот е испратен на принуден одмор со 50 проценти од платата, дел со 70 проценти и тие се обврзани да дежураат во одредени денови.
Во меѓувреме, НОВА дознава дека вработените биле свикани на состанок во болницата, каде што им било ветено дека плата ќе добијат на крајот на април или почетокот на мај.
„Ни соопштија дека ќе има и нови договори, нема да важат старите. Кажано ни беше дека ќе не викнат следната недела да ги потпишеме новите договори, а ако не сакаме, да си дадеме отказ“, тврдат вработени од болницата за НОВА.
Од свеченото пуштање во употреба на болницата
Неофицијално, болницата се продава. Наводно нема доволно приход, а сопственикот кој е италијански државјанин уште долго нема да дојде во државата.
