Младиот македонски писател Ненад Јолдески е добитник на наградата за литература на Европската унија.
Европскиот комесар Тибор Наврашич за образование, култура, млади и спорт денес ги објави имињата на 12 добитници на оваа награда за 2016 година. Наградата ги одликува младите и талентирани автори од Европа.
Покрај Јолдески, награда добија Тања Ступар-Трифуновиќ ид Босна и Херцеговина, Кристоф Ван Геревеј од Белгија, Антонис Георгиу од Кипар, Бројн Расмусен од Данска, Пааво Матсин од Естонија, Селја Ахава од Финска, Бенедикт Велс од Германија, Гаст Грубер од Луксембург, Клаудио М. Флориан од Романија, Јасмин Б. Фрелих од Словенија и Јесус Караско од Шпанија.
Комесарот подвлече дека оваа награда им оддава почит на авторите кои ја почнуваа својата кариера и им помага да стекнат нова читачка публика надвор од нивните земји.
- Литературата и слободниот напишан збор ни овозможуваат подобро да се разбереме себе си и другите – нешто што денес е поважно од кога и да е. Оттука, ние ќе продолжиме да ја поддржуваме преведувачката активност, издаваштвото, продажбата и читањето на странската литература, рече комесарот.
Секој награден автор добива сума од 5.000 евра но и промоција и меѓународен визибилитет за неговото дело на сите важни саеми на книги во Европа како Франкфурт, Париз или Лондон.
ЕУ ги охрабрува издавачите на овие автори да поднесат барање за ЕУ фондот кој ќе помогне делото да биде преведено на повеќе јазици.
Наградите ќе бидат предадени на свеченост во Брисел на 31 мај.
Ненад Јолдески е роден во 1986 година во Струга, економист е магистер по Општа и компаративна книжевност на државниот Филолошки факултет на тема „Интертекстуална иронија во модерниот и постмодерниот расказ“.
Автор е на „Штамата на Енхалон“ од 2009 година, збирка раскази напишани на струшки дијалект. Неговата втора збирка раскази од 2012 година е „Секој со своето езеро“.