Лидерите на главните политички групи во Европскиот парламент (ЕП) денес и дадоа поддршка на кандидатурата на Жан-Колд Јункер за претседател на Европската комисија (ЕК). Тие сметаат дека мора да се почитува демократијата. Европската народна партија (ЕНП) доби најмногу гласови на последните европски избори во мај па според тоа и нејзиниот кандидат за ЕК мора да биде избран, јавува европскиот портал Еурактив.
Новиот претседател на ЕНП, демохристијанската група, Германецот Манфред Вебер изјави дека пораката е јасна: ако европските лидери изберат друг човек наместо Јункер, тоа ќе донесе институционална криза. “Не сакаме да дојдеме во конфликтна ситуација но единственото мнозинство во ЕП е во корист на Јункер”, рече Вебер.
Поддршка за Јункер дојде и од претседателот на социјалистичката група Ханес Свобода кој вели дека во име на демократијата, европските лидери мораат да ги почитуваат резултатите од изборите.
Кандидатурата на Јункер не му е по вкус на Девјид Камерон за кој Јункер е “човек од минатото” и преголем федералист.
Овие карактеристики упатени на адреса на Јункер не му се допаднаа на Вебер кој смета дека Велика Британија е само една членка од сите 28 на ЕУ и подвлече дека зборовите на Камерон се “неприфатливи” и дека претставуваат “кампања на клевети”.
Луксембуршкиот печат, татковината на Јункер, објавија дека британските таблоиди направиле опсада на куќата на Јункер по што морала да интервенира и полицијата.
Вебер инсистира одлуката за идниот прв човек на ЕК да биде донесена на 26 и 27 јуни, за време на самитот на европските лидери што потоа ќе му овозможи на ЕП да се изјасни за предлогот на лидерите на 15 јули кога се одржува првата пленарна седница.
Германката Меркел веќе ја даде својата поддршка за Јункер.