Европскиот парламент побара од Европската Унија да воведе уште поостри санкции против Русија, вклучително и целосен прекин на увозот на енергенси од таа земја, како и вклучување на Белорусија, која е сојузник на Кремљ.
Во резолуцијата што беше усвоена денеска со 513 гласа „за“, 22 „против“ и 19 воздржани, европратениците повикаа на дополнителни санкции за Русија, вклучително и „целосно ембарго за увоз на руска нафта, јаглен, нуклеарно гориво и гас што е можно поскоро“.
Тоа треба да биде придружено со план за гарантирање на безбедноста на снабдување со енергија во ЕУ, како и стратегија за „запирање на санкциите доколку Русија преземе чекори за враќање на независноста, суверенитетот и територијален интегритет на Украина во нејзините меѓународно признати граници и целосно да ги повлече своите војници од територијата на Украина“.
„Постојните санкции мора целосно и ефективно да се применат низ ЕУ и меѓународните сојузници на ЕУ како приоритет“, велат европратениците.
Тие ги повикуваат лидерите на ЕУ да ја исклучат Русија од Г-20 и другите мултилатерални организации, како што се УНХРЦ, Интерпол, Светската трговска организација, УНЕСКО и други „што би било важен знак дека меѓународната заедница нема да се врати на старо со таа држава-агресор“.