Историски ден за Србија кој го натера комесарот за проширување Штефан Филе да испрати твит на српски јазик најавувајќи дека преговорите за членство меѓу ЕУ и Србија навистина започнаа.
Белград го почнува процесот на преговори со ЕУ кој треба да ја донесе земјата до полноправно европско членство. Утринава во Брисел се отвори меѓувладината конференција со која официјално се отвораат преговорите за членство во ЕУ.
Во Брисел допатуваа премиерот Ивица Дачиќ и потпретседателот Александар Вучиќ кои беа пречекани од претседателот на Европската комисија (ЕК) Хозе Мануел Баросо. На ним им се придружија министерот за европска интеграција Бранко Ружиќ и шефицата на преговарачкиот тим Тања Мишчевиќ а ЕУ ја застапуваше грчкиот претседавач Евангелос Венизелос, комесарот за проширување Штефан Филе и амбасадорите на земјите членки.
Отворањето преговори стана можно откако на 19 април 2013 година Белград и Приштина, со помош на Брисел, склучија договор кој ја отпочнува нормализацијата на односите помеѓу Србија и Косово.
Според новата методологија на ЕУ новите земји кои преговараат за членство треба да започнат со отворање на поглавијата 23 и 24 кои се однесуваат на судството и фундаменталните права. Но освен овие две поглавија Србија ќе мора да го почне преговорите со уште едно ново поглавие под број 35 и кое се однесува на нормализацијата на односите со Косово. Скринингот за ова поглавие започнува веќе утре на 22 јануари и потоа ќе биде појасно кои теми ги содржи ова поглавие.
За да може Србија да стане членка на ЕУ по неколку години од неа се очекува пред се тотална нормализацијата на односите со Косово. Оттука член на преговарачкиот тим е и министерот за портфељ задолжен за Косово и Метохија Александар Вулин и кој ќе го води поглавието 35.
Според комесарот за проширување, Србија на очекуваат бројни предизвици на патот кон ЕУ: “нема време за опуштање”, изјави Филе за Танјуг додавајќи дека најважно е Белград да остане фокусиран на нормализација на односите со Косово и работа за доближување до европските стандарди како правната држава.
Според српскиот премиер целта на Белград е да ги заврши преговорите до 2018 година а потоа, вели тој, “не е до нас дали ќе бидеме примени во ЕУ во 2020 година”. Тој исто така потсети дека преговорите имаат свои правила и дека преговорите ќе бидат закочени доколку дојде до блокади во односите со Косово.