Азиските акции денеска бележат пад во шеста сесија по ред, по новиот скок на цените на енергенсите во Европа. Скокот на цените ги поттикна стравувањата од рецесија и ги зголеми приносите на обврзниците, додека европската валута – еврото падна на најниско ниво во последните 20 години.
Референтните цени на гасот во Европската Унија (ЕУ) во текот на ноќта достигнаа рекордно високо ниво, 14 пати над просекот за изминатата деценија.
Аналитичарите на американската банка „Сити“ вчера предупредија дека инфлацијата во Велика Британија би можела да надмине 18 отсто, доколку не се ограничат цените на енергијата. Инфлацијата на потрошувачките цени последен пат достигна такво ниво во 1976 година.
Аналитичарите сметаат дека „тешката енергетска ситуација“ сугерира дека врвот на инфлацијата сè уште не е достигнат, со голема можност инфлацијата да остане висока уште некое време доколку не дојде до реакција од централните банки.
Еврото вчера го достигна најниското ниво во однос на доларот во последните дваесет години и падна под нивото на паритет. Едно евро чинеше 0,9937 долари.
Најавеното затворање на „Северен тек 1“ заради одржување на гасоводот од 31 август до 2 септември дополнително ги зголеми стравувањата од недостиг и доведе до енормно зголемување на цената на гасот во Европа.