Атина: Таксистите во областа Атика, поширокиот регион на Атина во 6 часот утрово започнаа 48-часовен штрајк, со што грчката метропола денеска и утре ќе биде без такси превоз.
Штрајкот е организиран од синдикатот на такси превозници (САТА) кои реагираат за министерската одлука со која им се дозволува на приватни комбиња да пренесуваат патници.
Паралелно, бараат повлекување на конкретната одлука, но ги истакнуваат и останатите нивни барања како што се: поддршка на професионалните такси возачи; ставање крај на дигиталните платформи за такси превоз; итно решение за хроничните проблеми на таксистите; дозвола за движење во автобуските ленти итн.
Оваа борба не е само за таксистите. Тоа е борба за демократија, за достоинство, за правото на работа. Тоа е и борба за патниците, соопштија од САТА.
Штрајкот на таксистите ќе заврши в четврток во 6 часот наутро.