Kоординаторот на пратеничката група на ДПА Беким Фазлиу го фрли Деловникот за работа на СОбранието од говорница во знак на револт од предлогот поднесен од ВМРО-ДПМНЕ да се ограничат дебатите на комисиите за буџет, за економија и за европски прашања.
„Со ваков предлог Парламентот ќе ја изгуби својата функција, се претера со измена на законите без дискусија. Сега со измените и на деловникот, Собранието на РМ се претвори во алатка на извршната власт. Ваков предлог за промена на деловникот без консензус потсетува само на времето на комунизмот“, рече Фазлиу.
Откако заврши со говорот, тој го фрли Деловникот од говорницата кон празните столчиња на пратениците од опозицијата, кои веќе месец ипол ја бојкотираат работата на Собранието.
ВМРО – ДПМНЕ предложи дискусијата на пратениците да трае не подолго од 20 минути, а координаторите на пратеничките групи не подолго од 30 минути при општ претрес на законите во Комисија во прво читање.
Во второ читање, односно при амандманска расправа пратеник да може да говори еднаш не подолго од 10 минути, а координатор на пратеничка група не подолго од 15 минути.
Во општ претрес и во амандманска расправа, дебатата да трае не повеќе од три дена.
Предлогот го помина првиот филтер и сега оди на второ читање во Комисијата за мандатно-имунитетни прашања.