Филе: ЕУ со трета фаза санкции за Русија

Земјите на Европската унија кон Русија подготвуваат следна фаза на санкции, кои би требало да имаат економски ефект, изјави еврокомесарот за проширување Штефан Филе за Чешката државна телевизија.
ЕУ, како и САД, веќе воведе санкции, замрзнување на странските банкарски сметки и забрана на влез на својата територија кон конкретни лица од Русија и Крим, кои се одговорни за референдумот за приклучување на украинската автономна република кон Руската Федерација.
Според Филе, санкциите кон Русија немаат за цел да ја казнат земјата, туку да ја принудат кон преговарачката маса.
– Јас мислам дека целта на санкциите е да се вратиме кон преговарачката соработка и кон напорите за наоѓање на мирно решение. Примарна цел на санкциите не е да казнуваат, туку се средство за постигнување на целта и заедно со дипломатијата да обезбедат простор за мирно решение – рече Филе.
Драматичната ситуација во Украина според Филе нема да се реши за неколку месеци, затоа ЕУ на Русија и остава простор да седне на преговарачка маса.
– Во третата фаза на санкциите од страна на ЕУ јасно се дава до знаење дека може да дојде до поголеми последици кои ќе имаат економски ефект. А во тие рамки постојат многу чекори кои можат да се преземат според потребите – додаде комесарот на ЕУ, не сакајќи да одговори конкретно кои се предвидувањата на ЕУ за можниот развој на понатамошната ситуација.
Филе оцени дека европските санкции во третата фаза би се примениле во наредните денови или недели.
– За нас, руските чекори во последните недели се потполно изненадување. Посебно бидејќи доаѓаат од партнер кој долго време се криеше зад меѓународното право и го користеше како алиби за редица свои специфични чекори. Сега дојде до ситуација кога меѓународното право го толкува и „силува“ како што сака -вели Филе.
Во врска со започнувањето на процесот за потпишување на Спогодбата за асоцијација кон ЕУ, која на Украина би и донела економски погодности, Филе коментираше дека завршувањето на овој процес нема да значи предност за Крим при трговијата со ЕУ.