„Филип Морис“ станува стратешки партнер на Тутунскиот Комбинат Прилеп, откако како единствена компанија која се понудила на јавниот повик, ги исполнува условите за соработка.
Генералниот директор на Тутунскиот Комбинат, Александар Дерменџиев вели „Филип Морис“ доставиле солиден бизнис план.
„Одборот на директори донесе одлука за јавен повик за стратешко партнерство. На истиот се јави само еден понудувач, компанијата „Филип Морис“. Беше формирана комисија која требаше да одлучи дали понудувачот ќе ги исполни условите од јавниот повик. Комисијата даде позитивна препорака, а вчера се одржа седница на Одборот на директори да се прифати понудата на единствениот понудувач“, изјави Дерменџиев.
Тој додава дека во наредниот период се очекува да се премине кон имплементација на бизнис планот. Прилепскиот загубар е втора најголема компанија за производство на цигари и држи 19 отсто од пазарот, додека на прво место е Империал Тобако ТКС од Скопје со 61 отсто од продажбата.
„Филип Морис“ речиси десетина години е присутна во северниот сосед Србија, откако компанијата ја купи тутунска индустрија „Ниш“.