Во целост ги демантирам лагите и дезинформациите објавени на неколку медиуми дека Република Северна Македонија преку „посредник – српски државјанин“, ја набавила вакцината против Ковид 19, Спутник В производство на рускиот Центар „Гамалеја“. Станува збор за чиста лага. Набавката на вакцината Спутник В од самиот почеток се одвива во директна комуникација со Рускиот инвестициски фонд во Москва и нема никаков посредник во комуникацијата. Првите 3.000 дози вакцини веднаш пристигнаа откако МЗ го потпиша договорот за набавка на 200.000 вакцини од производителот на вакцината Спутник В.
За набавка на вакцини против Ковид 19, без разлика дали станува збор за Спутник В, Синофарм, Астра Зенека или Фајзер, или Ковакс механизмот, нашата држава ја плаќа цената на вакцината понудена од производителот, нема никакви провизии за ниту една набавка на вакцини против Ковид 19. Ваквите лажни вести имаат за цел намерно да го нарушат процесот на набавки на вакцини, напиша министерот Венко Филипче на Фејсбук.
Претходно, извесен Никола Лакушиќ, Србин кој живее во Швајцарија во изјава за Ал Џезаира тврдеше дека е посредник на руските вакцини Спутник-В за Македонија. Покрај нашата земја, тој е посредник и за БИХ, Алжир и Бугарија.