– Чест ми беше да го запознаам семејството на Верица Белчовска чија големина и алтруизам оставаат без зборови, напиша министерот за здравство Венко Филипче кој на својот фејсбук профил соопшти дека денеска остварил средба на која им ветил дека ќе се заложи за решавање на проблемот со вработувањата кој го имаат.
-Со овој чин досега спасија три животи. Во име на Владата и мое лично име уште еднаш им се заблагодарив од срце за нивниот несебичен гест, напиша Филипче.
Органодарителството, како што посочи министерот за здравство, е највисок чин на хуманост, и истакна дека се повеќе граѓаните стануваат свесни за неговата важност.
Министерот Филипче денеска го посети и младиот Иле, кој неполни два дена по операцијата која му го спаси животот, полека заздравува на Клиниката за кардиохирургија.
-Бескрајно благодарен на тимот на лекари кои помогнаа да добие нова шанса за живот и пред се на семејството на младата девојка чие срце денес чука во неговите гради. Му посакувам што поскоро да закрепне и да се врати дома кај неговото семејство, напиша Филипче на Фејсбук.