Министерот за здравство, Венко Филипче денеска на прес-конференција соопшти за неговото присутство на седницата на Владата на Бугарија, каде што доби ветување дека дел од вакцините, источниот сосед ќе испрати и за Северна Македонија.
Филипче зборуваше и за моменталната ситуација со коронавирусот.
„Има слободен број на кревети, досега во изминатиот период немаше. Има се повеќе термини за тестирање, значи се намалува притисокот. Намален е бројот на тестирања и во државните и во приватните лаборатории“, рече Филипче.
И покрај тоа што има позитивни придвижувања околу ситуацијата со Ковид-19 во земјава во последниот период, Филипче апелираше на внимателност, особено сега во период на новогодишните празници.
„Пред нас следи вообичаено убав период на Новогодишни празници, но ние имаме мнгу тешка година зад нас и верувам дека следната ќе биде многу подобра. Сакам да апелирам да не направиме сега да се влошио состојбата. Апелирам да се празнува одговорно, во кругот на семејството со пропишаните протоколи. Апелирам во следните 2-3 недели сите да бидеме крајни внимателни. Имаме некакви позитивни придвижувања, ќе видиме дали е тоа почеток на крајот на епидемијата“, рече Филипче.