Министерот за здравство Венко Филипче денеска изјави дека приватните специјализанти, запишани на јануарскиот конкурс 2018 година, во јуни ќе добијат мајска плата.
Новата генерација приватни специјализанти побараа ист третман за сите специјализанти, се’ до донесување на стабилно и вистинско долгорочно решение за сите засегнати.
„За нас докторите на приватна специјализација, секој следен ден поминат без плата претставува дополнителна фрустрација“, нагласија специјализантите кои денеска одржаа прес-конференција пред Министерството за здравство.
Министерот за здравство Филипче, кој дојде на пресот, посочи дека специјализантите веќе нема да работат без пари.
„Вие сте најкреативниот дел од нашето општество, вие мора да останете во оваа земја, вие сте иднината и на нашето здравство и на медицината“, им порача Филипче на специјализантите.
Тој нагласи дека во Македонија има дефицит од доктори, односно земјата има потреба од над 380 лекари во внатрешноста и околу 150 во Скопје.
„Доколку приватен специјализант се вработи во државна институција, таа ја презема специјализацијата“, објасни Филипче.
Тој наведе дека сега во законот има чудни услови за специјализантите за огромни суми на казни доколку тие се откажат од специјализација, нагласувајќи дека Владата веќе работи на измена на тие услови.
Пред два дена, околу 100 приватни специјализанти му пишаа отворено писмо на премиерот Зоран Заев, со кое бараат и тие да бидат вклучени во решението од Министерството за здравство за исплата на плати.
„Цела генерација од речиси 100 доктори е изоставена од ова право на исплата на плата за вложениот труд на Клиниките. Форсирањето за исплата на парични средства само за одредена група доктори е дискриминаторско. Плата мора да има за сите приватни специјализанти, друга опција не прифаќаме“, му напишаа меѓу другото незадоволните специјализанти на премиерот Заев.
Минималните трошоци, кои секој специјализант ги покрива за една приватна специјализација чинат помеѓу 8000 и 13 600 евра. Специјализациите во просек траат 5 години за време на кои дипломиран доктор специјализант не прима никаков паричен надоместок за својата работа.