Само со масовна вакцинација побрзо ќе се справиме со пандемијата предизвикана од кронавирусот. Министерот за здравство Венко Филипче денеска преку својот фејсбук-профил апелираше граѓаните да се пријават за вакцинација.
– Сега е време да придонесеме за побрзо надминување на пандемијата со коронавирусот. Процесот на имунизација е пред нас и само со вакцинација на голем број граѓани ќе успееме да стекнеме колективен имунитет. Пријави се за вакцинација денеска на vakcinacija.mk, напиша министерот Филипче на Фејсбук.
Според информациите кои ги објави министерот до сега вакцинирани се над 18 илјади граѓанин.
Филипче во текот на денешниот ден уште еднаш упати апел до верските заедници да ги повикаат верниците да се воздржат од собирања на престојните верски празници бидејќи како што рече доколку се случи нов кластер во верските објекти, притисокот врз здравствените установи ќе биде толку голем што ќе се доведе во прашање неговото менаџирање.
– Многу е битно сега и верските лидери да сфатат дека ситуацијата е навистина сериозна, дека епидемиолошката слика може дополнително да ја искомплицира состојбата во болниците, нешто што сакаме да го избегнеме, додава Филипче.