Општина Центар ги затвори читалните „Славко Јаневски“ и „Ацо Шопов“ со фонд од околу 3.000 донирани книги затоа што нема предвидено пари за таа намена во буџетот за 2019 година.
На оваа вест реагираше Фондацијата “Славко Јаневски”. Извршниот директор на Фондацијата Sвездан Георгиевски изјави дека е “најблаго речено, непријатно изненаден од ненадејната вест за одлуката на Општина Центар за затворање на двете нејзини читалници, особено за одлуката за затворање на читалницата „Славко Јаневски“.”
“Напоменуваме дека ниту во еден момент не бевме консултирани при донесувањето на оваа одлука ниту пак бевме во можност да понудиме евентуални решенија за да може да се ублажи евидентната штета што оваа одлука неминовно ја носи со себе. Ова го велиме затоа што читалницата „Славко Јаневски“ поседува квалитетен книжен фонд (а тука се наоѓаат и мошне вредни книги), скулптури и уметнички дела. Најголемиот дел од книжниот фонд и уметничките дела се приватни донации и подароци, меѓу кои најзначајна е донацијата на семејството на Славко Јаневски. Со одлуката за затворање на читалницата останува нејасна судбината на сите овие донации и вредни дела. За жал, немаме информација како ќе се постапува со нив, каде ќе завршат и дали донаторите ќе се сложат со новите ршенија. Без оглед на реакциите на јавноста и нашите обиди, надлежните од Општината сѐ уште не немаат контактирано во обид да пронајдеме заедничко решение. Сепак сме во надеж дека заеднички ќе дојдеме до соодветно издржано решение, со кое ќе се минимализира штетата настаната од оваа ситуација”, стои во соопштението на Фондацијата.
Читалните беа отворени во 2015-та, а зачленувањето, како и задолжувањето со книги беше бесплатно. Станува збор за две читални кои имаат околу 1.000 членови-читатели. „Славко Јаневски“ се наоѓа на булеварот „Димитрие Чуповски“ додека „Ацо Шопов“ е во трговскиот центар „Беверли хилс“ во Капиштец.
Градоначалникот на Општина Центар на својот Фејсбук профил денес демантираше дека овие читални ќе бидат затворени иако претходно Општина Центар потврди дека нема доволно пари за овие читални.
“Би сакал да ги демантирам написите во одредени медиуми дека читалните кои се наоѓаат на територија на Општина Центар ќе бидат затворени. Имено, поради високите кирии кои општината ги плаќа за читалните, станува збор за преместување на дел од читалните на други локации, а дел ќе останат на истите локации каде што се наоѓаат и денес. Општина Центар ја поддржува кулутурата, културниот развиток и читањето книги како основни општествени елементи на една личност и со својата поддршка и понатаму ќе продолжи со истата динамика на стимулирање на културен и научен развој”, напиша Богдановиќ.