Фондот без одговор зошто одобрението за лекување го испрати по смртта на Тамара

Нема одговор од Фондот за здравство зошто Решението со кое се одбрува лекување во странство на Тамара, семејството го доби синоќа, четири дена по нејзината смрт. Дали станува збор за бавна административна процедура, доцнење на Комисијата или грешка. На телефон не се достапни ниту службите за односи со јавност.

Единствено што добивме како информација е дека е одобрено лекување во Турција на 12 годишната Мартина Стојковска од Струмица која има искривен рбет, а нејзината здравствена состојба се повеќе се влошува.

„ФЗОМ ја информира јавноста дека позитивно е решено барањето за лекување во странство на девојчето М.С, кое се испраќа на лекување во странство во Турција, во времетраење од осумнаесет дена и во придружба на родител. Родителите се информирани“се вели во краткото соопштение од Фондот за здравство.

Семејството на малата Тамара синоќа доживеа вистински шок во нивниот дом во Велес, стигнало Решение од Фондот за здравство со кое и се одобрува лекување на Тамара во странство. Иронијата да биде поголема Решението е испратено на 11 февруари, два дена откако почина малата Тамара, а одлуката е донесена на 6 февруари, три дена пред да почине.

Потписници на документот се претседавачите на двете комисии, на Првостепена Викторија Чаловска и на Второстепена комисија Анастасика Поповска, како и двајцата директори на Фондот Маја Парнаџиева Змејкова и Џемаил Мехази. 

„Гневна сум, поголема иронија во животот немам доживеано. Не и дозволија да се лекува, а сега ја вознемируваат и почината. Што да правам со решението на гробот ли да и го однесам“ со растреперен глас и видно вознемирена вели Жаклина, мајката на Тамара за НОВА.

Откако семејството апелираше за помош во медиумите, министерот Тодоров рече дека ќе се заложи за случајот и вети дека Тамара ќе отпатува на лекување во странство. Но, само усно. 

Решението во домот на Тамара стигна премногу доцна, четири дена по нејзината смрт. Откога почина малата Тамара, Комисијата во Фондот експресно одобри лекување на Мартина која исто така има деформитет на рбетот, а неофицијално позитивно е решено и за уште еден случај на седумгодишно девојче. Ова е Решението со кое се одобрува лекување кое семејството Димовски го доби откога почина нивната ќерка.