Фондот за здравство се оградува од одговорноста за смртта на малата Тамара Димовска. Од Фондот денеска излегоа со објаснување за случајот, за како што рекоа да медиумите да не објавуваат шпекулации и да изразат сочувство до семејството.
„Фондот за здравство не е причинител за смртта на малата Тамара, а кој е не знаеме. Ние не сме лекарска установа и не знаеме од што починало девојчето. Доколку родителите бараат институционална одговорност ние стоиме на располагање“, изјави Бранко Аџигогов , советник на директорот на Фондот.
Аџигогов рече дека за сериозноста на случајот одлучуваат лекари, постои Комисија составена од седум лекари.
„Овој случај беше решен во декември минатата година. Турскиот лекар кој требаше да ја изврши операцијата бараше помош од уште двајца спинални хирурзи бидејќи операцијата беше комплицирана. Со родителите се договоривме после 8-ми февруари да биде договорена процедурата“ изјави Бранко Аџигогов , советник на директорот на Фондот.
Случајот на малата Тамара која имаше тежок деформитет на рбетниот столб се влечеше цели три години. Институциите не можеа да се договорат каде ќе се оперира девојчето, а за тоа време нејзината здравствена состојба се влошуваше, кривината достигна до 80-100 степени, така што и странските лекари почнаа да креваат раце.
Неофицијално, од Министерство за здравство била издадена наредба да се стопираат сите операции на рбетниот столб, се додека не се отвори новиот Спинален центар. Нема потврда од Министерството за ваквата информација. Министерот Тодоров денеска не се одважи да се појави во јавноста и да објасни зошто не се направи ништо за да се спаси еден млад живот.
Изминатиот период се покажа дека Министерството и Фондот не се координирани меѓу себе, така што дури и министерот Тодоров во една прилика пред Нова година, пред новинарите изјави дека мислел дека случајот со Тамара е решен.
Граѓаните се згрозени и на социјалните мрежи масовно повикуваат на оставка на министерот Тодоров.
Семејството Димовски од Велес, најави дека ќе бара одговорност за смртта на нивната 9-годишна ќерка.
Инаку, пред две години на 26 јануари 2013 година година Владата излезе со информација дека во иднина граѓаните ќе плаќаат само 200 евра партиципација за лекување во странство. Од тогаш процедурата за испраќање во странство не е поедноставена, ниту забразана.
Случајот на Тамара Димовска покажува дека институциите потфрлија со малото девојче. Вакви операции, не се ништо ново во медицината, но долгото одолговлекување на постапката ја влоши нејзината здравствена состојба и на крај се заврши со смртен исход.